पर्सा, १९ मंसिर ।
राष्ट्रिय स्वतन्त्र पार्टी (रास्वपा) सभापति रवि लामिछाने र पूर्वडीआईजी छविलाल जोशी विरुद्ध पर्साबाट पनि पक्राउ पुर्जी जारी भएको छ । लामिछाने र जोशीसहित १४ जनाविरुद्ध पक्राउ पुर्जी जारी भएको जिल्ला प्रहरी कार्यालय पर्साका डीएसपी किशोर लम्सालले बताउनुभयो ।
सानो पाइला सहकारीको रकम अपचलन गरेको कसुरमा उनीहरुविरुद्ध प्रहरीले अनुसन्धान गरिरहेको छ । जीबी राई समूहले सञ्चालन गरेका पाँच सहकारीबाट करोडौँ रकम गोर्खा मिडियामा गएको थियो ।
लामिछाने गोर्खा मिडियाको सञ्चालक तथा प्रबन्ध-निर्देशक हुँदा उहाँले खर्च गरेको र सोही आधारमा उहाँलाई अनुसन्धानको दायरामा तानिएको प्रहरीले जनाएको छ ।
प्रकाशित मिति : २०८१ मङ्सिर १९ गते बुधवार
