दाङ, १६ असार । दाङमा आफ्नै ससुराको गोठमा आगो लगाएको अभियोगमा प्रहरीले एकजना महिलालाई पक्राउ गरेको छ ।
बङलाचुली गाउँपालिका-५ साकिनेका २६ वर्षीया खेमा घर्तीलाई हिजो शनिबार प्रहरीले पक्राउ गरेको हो । ७३ वर्षीय ओबिराम घर्तीको गोठमा उहाँको बुहारी खेमाले आगो लगाकी हुन् ।
घरायसी विवादको कारण शुक्रबार राति खेमाले सलाईको काँटीबाट गोठको छानामा आगो लगाएको प्रहरीले जनाएको छ ।
आगलागीबाट गोठ पूरै जलेर नष्ट भएको छ । इलाका प्रहरी कार्यालय कमिरेचौरबाट खटिएको टोलीले खेमालाई पक्राउ गरेको हो ।
प्रकाशित मिति : २०८१ असार १७ गते आइतवार
