२०८० फाल्गुन २२ गते मङ्गलवार

प्रहरीले चक्कु खोज्न पठाएका व्यक्ति मृत भेटिएपछि….

दाङ, १४ भदौ । सोमबार बेलुका प्रायः शान्त रहने दाङको दंगीशरण गाउँपालिका–२ गोलटाकुरी गाउँ अशान्त बन्यो। गोलटाकुरी अशान्त बन्नुको कारण सहोदर दाजु भाइ बीचको झगडा थियो ।

सँगै मदिरा सेवन गरेका ५७ वर्षीय दाइ देवबहादुर पुन र ५२ वर्षीय भाइ कर्णबहादुर पुन मातेपछि बाझाबाझ गरे । उनीहरूबीचमा कुटाकुट भयो। भाइले दाजुलाई चिरपटले घुँडा मुन्तिर प्रहार गरे। आक्रमणबाट दाजु देवबहादुरको खुट्टामा घाउ लाग्यो। यद्यपि घाउ भने ठूलो थिएन।

यो घटना बेलुकी झन्डै साढे ८ बजेतिरको थियो।

मंगलबार राति २ बजे स्थानीय प्रहरीलाई घटनाबारे खबर गरियो। गोल्टाकुरी प्रहरी चौकीबाट प्रहरी खटियो। केहीबेरमै दाजु कुटेका आरोपित भाइ कर्णलाई प्रहरीले नियन्त्रणमा लियो।

गोलटाकुरी प्रहरी चौकीका प्रमुख असई इन्द्र जिसीका अनुसार कर्णलाई बिहान ४ बजेतिर थुनामा राखिएको हो।

मंगलबार पुन परिवारको देउता (देवाली) पूजा थियो। त्यही भएर थुनिएका काका कर्णलाई छोडिदिन आग्रहसहित भतिज विराज पुन प्रहरी चौकी पुगे। विराजको जिम्मा जमानीमा बिहान ८ बजेतिर कर्णलाई प्रहरीले छोड्यो।

उपचार खर्च व्यहोर्ने विषयमा लगभग कुरा टुंगिएको भए पनि पूजा सकिएपछि फेरि छलफल गर्ने सहमति भएको थियो।

पुनको घर परिवारले आपसमा मिलेरै देवाली पूजा पूरा गरे। विराजका अनुसार प्रहरीको आग्रहमा फेरि उनले काकालाई छलफलका लागि चौकी पु¥याए।

दाजुभाइ बीचको सामान्य कुटाकुटको झगडामा गाउँ पक्ष र विपक्षमा विभक्त बन्यो। गाउँले अधिकांश दाजुको पक्षमा बोले भने भाइको पक्ष पनि केही उभिए।

प्रहरी चौकीको कचहरीमा भाइ कर्णले दाजु देवबहादुरलाई चक्कुले प्रहार गरेको तथा उनले त्यसपछि पनि चक्कु देखाएर गाउँ घरलाई त्रसित पारेको भन्दै गाउँले केही महिलाले चर्को बोले। कर्णमाथि कुनै पनि हालतमा कडा कारबाही हुनुपर्ने माग राखे।

त्यसपछि प्रहरीले कर्णलाई दाजुमाथि प्रहार भएको चक्कु खोजेर तुरून्त ल्याउनु भन्दै पठायो। चक्कु खोजेर ल्याउने शर्तमा कर्ण प्रहरी चौकीबाट निस्किए।

गोलटाकुरी प्रहरी चौकीका प्रमुख ईन्द्र जिसीले पनि छलफलको निष्कर्ष अनुसार कर्णलाई चक्कु खोजेर ल्याउन भनेर पठाइएको कुरा बताए ।

झगडामा सामेल दुई पक्षमध्ये एउटा पक्ष बेलुकासम्म गोलटाकुरी प्रहरी चौकीमा कर्ण चक्कु लिएर आउलान् र त्यसपछि कानुनी कारबाहीको प्रक्रिया अगाडि बढाउँला भनेर प्रतीक्षारत थिए ।

तर, कर्ण वाचा गरेअनुरूप आएनन् । बेलुका अबेर हुन थालेपछि त्यहाँ बसिरहेका एक पक्षलाई बुधबार थप छलफल गर्ने भनेर प्रहरीले सम्झाइ–बुझाइ गरी घर पठाएको असई जिसीले बताए ।

चक्कु खोज्न निस्किएका कर्ण त्यो दिन राति घर पनि गएनन् । प्रहरीका अनुसार सम्पर्क गर्नलाई न उनको घरमा मोबाइल थियो न त कर्णसँगै नै ।

बिहानसम्म पनि उनको अत्तोपत्तो भएन ।

सोही दिन दिउँसो कर्णको शव घरभन्दा झन्डै एक हजार मिटर टाढा खोलाको एक रूखमा झुण्डिएको अवस्थामा फेला प¥यो ।

प्रहरी प्रमुख ईन्द्र जिसीका अनुसार प्रहरीले उनी झुण्डिएको खबर बुधबार दिउँसो ३ बजेतिर पाएको थियो ।

दंगीशरण –२ का वडाध्यक्ष डम्मर खत्रीले त्यो खबर पाए ।

प्रहरीकै गल्ती र कमजोरीका कारण कर्णबहादुरले आत्महत्या गरेको दोषारोपन गर्न थालियो ।

आरोप चर्को बन्दै परिस्थिति असहज बन्ने देखिपछि गोलटाकुरी प्रहरी चौकीका प्रहरी प्रमुख असई ईन्द्र जिसीलाई तत्काल इलाका प्रहरी कार्यालय तुलसीपुरमा सारियो ।

कर्णबहादुरका भतिज विराज पनि स्थानीय केही महिलाको उक्साहटमा प्रहरीले जसरी पनि दाजु देबबहादुरमाथि प्रहार भएको चक्कु खोजेर ल्याऊ भनेर दबाब दिएको र खोज्न एक्लै पठाउने कमजोरी गरेको दोषारोपन गरे ।

‘यहाँ चक्कु प्रयोग भएको भए पो ल्याउनु ,’ विराजले प्रश्न गरे, ‘प्रयोग नै नभएको चक्कु उहाँले कहाँबाट ल्याउन सक्नु हुन्थ्यो र?’

विराजका अनुसार स्थानीय दुई महिलाले प्रहरी चौकीमा कर्णबहादुरले चक्कु देखाएर समाजलाई त्रसित र आतंकित पारेको भनेर झुटो कुरा गरेको र त्यसैका आधारमा प्रहरी अधिकारीले काकालाई चक्कु खोजेर जसरी पनि ल्याउनू भनेर दबाब दिएको दाबी गरे ।

‘चक्कु खोज्न प्रहरी पनि सँगै जानुपर्ने होइन? कुनै आरोपित व्यक्ति आफैंले अरूलाई आक्रमण गर्न प्रयोग गरेको चक्कु लिएर चौकी फर्किन्छ भन्ने पत्याउने प्रहरी मूर्ख हैनन् ?,’ विराजले भने, ‘प्रहरी हिरासतमा थुनेपछि सामान्य मानिस आत्तिन्छ, आतिन्न, त्यसैले काका मृत्यु मार्ग रोज्न बाध्य हुनु भयो ।’

गाउँपालिका अध्यक्ष शम्भु गिरीले पनि प्रहरीकै कमीकमजोरीका कारण कर्णबहादुरले आत्महत्या गर्न बाध्य भएको भनेर स्थानीयले भनिरहेको हुँदा कमजोरी गर्ने प्रहरीमाथि अनुसन्धान हुनुपर्ने माग गरे ।

प्रहरी अधिकारी भने कर्णबहादुरको आत्महत्यालाई गिजोल्न स्थानीय राजनीतिक दलहरू र केही जिम्मेवार जनप्रतिनिधिले पनि गलत कुरा बोलिरहेको बताउँछन्।

‘दाजुभाइ आपसमा मातेर भएको कुटाकुटमा हामी मिल्छौं र हाम्रो घरमा देवाली पूजा छ छोडिदिनुस् भन्ने आग्रहमा प्रहरी मान्नुपर्छ कि नाइँ?’ , एक प्रहरी अधिकारीले भने, ‘यदि भनिएको जस्तै घटनामा चक्कु प्रयोग भएको हो र त्यो कसैले देखेको छ भने आरोपित सँगै लिएर आउनू भनेर पठाउनु कसरी प्रहरीको कमजोरी हुन्छ?’

सधैं मदिरा खाने र प्रायः घर परिवारमा पनि झैंझगडा गरिरहने कर्णबहादुर आफैंले गरेको आत्महत्याको घटनामा प्रहरीलाई दोष लगाउनु अन्याय हुने उनले बताए । –सेतोपाटीबाट

प्रकाशित मिति : २०८० भाद्र १४ गते बिहिवार
प्रतिक्रिया दिनुहोस