२०८१ बैशाख ११ गते मङ्गलवार

राष्ट्रिय सभा निर्वाचनका लागि आज मनोनयन दर्ता

दाङ, २३ पुस । आगामी माघ ११ गते १९ सिटका लागि हुने राष्ट्रियसभा सदस्य निर्वाचनका लागि आज उम्मेदवारहरूले मनोनयन दर्ता गर्दैछन् ।

देशका सातवटै प्रदेशमा खडा गरिएका निर्वाचन अधिकृतको कार्यालयमा बिहान १० देखि दिउँसो ३ बजेसम्म मनोनयन दर्ताको समय रहेको निर्वाचन आयोगले जनाएको छ ।

आयोगका अनुसार पुस २४ गते उम्मेदवारविरुद्ध दाबी, विरोध तथा उजुरी गर्न सकिने छ । यस्तै २५ र २६ गते उजुरी, दाबी, विरोधमा जाँचबुझ गरी उम्मेदवारको नामावली प्रकाशन हुनेछ ।

पुस २७ गते उम्मेदवारी फिर्ता लिन चाहनेका लागि समय तोकिएको छ भने सोही दिन उम्मेदवारको अन्तिम नामावली प्रकाशन हुनेछ । पुस २८ गते आयोगले उम्मेदवारलाई निर्वाचन चिह्न प्रदान गर्नेछ ।

राष्ट्रियसभा निर्वाचनको मतदानका लागि सात प्रदेशमा एक-एक मतदानस्थल र दुई-दुईवटा मतदान केन्द्र कायम गरिएको छ ।

लुम्बिनी प्रदेशमा रिक्त हुने दुई सिटका लागि निर्वाचन हुने छ । घोराहीस्थित निर्वाचन निर्वाचन अधिकृतको कार्यालयमा बिहान १० बजेदेखि ३ बजेसम्म उम्मेदवारी दर्ताको अवधि तय भएको छ ।

लुम्बिनी प्रदेशमा दुई सिटका लागि हुने निर्वाचनअन्तर्गत उम्मेदवारी दर्ताको तयारी पूरा भएको छ । यो प्रदेशबाट राष्ट्रियसभामा प्रतिनिधित्व गरेका कांग्रेसकी अनिता देवकोटा र एमालेका कुमार दसौंदीको कार्यकाल सकिने भएपछि दुई रिक्त स्थानमा निर्वाचन हुन लागेको हो ।

प्रकाशित मिति : २०८० पुष २३ गते सोमवार
प्रतिक्रिया दिनुहोस