दाङ, २३ पुस ।
नेपाल सुनचाँदी व्यवसायी महासंघका केन्दीय अध्यक्ष माणिक रत्न शाक्यले अन्तर्राष्ट्रिय बजारमा नेपाली गरगहना निर्यातमा समस्या रहेको बताउनुभएको छ ।
तुलसीपुर दाङ सुनचाँदी व्यवसायी संघको १४ औँ वार्षिक साधारणसभाको शनिबार आज उद्घाटन गर्दै अध्यक्ष शाक्यले सुनका नेपाली गरगहना विश्वमा छरिएर रहेका नेपालीमाझ पुर्याउनसके आर्थिक समृद्धि प्राप्त गर्न सकिने बताउनुभयो ।
अध्यक्ष शाक्यले नेपाली गरगहना बनाउन विदेशी कालिगड ल्याउनुपर्ने अवस्थाको चाँडै अन्त्य गर्न महासंघले कालिगड उत्पादनमा जोड दिएको बताउनुभयो । नेपाली गरगहना बनाउन विदेशीको भर पर्नुपर्ने तर रोजगारीका लागि नेपाली विदेश जानुपर्ने अवस्थाको अन्त्यका लागि उहाँले सिटिईभिटी मान्यताप्राप्त प्रमाणपत्र कालिगड उत्पादनको प्रक्रिया शुरु भइसकेको बताउनुभयो ।
यस्तै उहाँले नेपाल राष्ट्र बैंकले पर्याप्त सुन बिक्रि नगर्दा उपभोक्तलाई सुन पुर्याउनै मुस्कील हुने गरेको बताउनुभयो । नेपालमा दैनिक ३० केजीभन्दा माथि सुन आवश्यक भएपनि अहिले दैनिक १० केजी सुनमात्रै व्यवसायीले पाउने गरेको उहाँले बताउनुभयो ।
संघका अध्यक्ष हरिकृष्ण विकको अध्यक्षता तथा नेपाल सुनचाँदी व्यवसायी महासंघका अध्यक्ष शाक्यको प्रमुख आतिथ्यतामा साधारणसभाको उदघाटन गरिएको हो । त्यस अवसरमा निवर्तमान स्वास्थ्य राज्य मन्त्री हिराचन्द्र केसीले बैंकको व्याजदर वृद्धिले व्यवसायी मारमा परेको बताउनुभयो । उहाँले सरकारले कालिगडलाई आवश्यक तालिम प्रदान गर्न आवश्यक बजेट निर्माण गर्नुपर्ने बताउनुभयो ।
कार्यक्रममा केन्द्रीय कोषाध्यक्ष सुदिप श्रेष्ठले कच्चापदार्थको आपूर्तिमा दिर्घकालिन समाधान आवश्यक रहेको बताउनुभयो । उहाँले गतवर्ष नेपालबाट विश्वबजारमा ३० करोडको सुनका गरगहना निर्यात भएको र जुन निकै कम भएको बताउनुभयो ।
मानवअधिकार तथा शान्ति समाज केन्द्रीय वरिष्ठ उपसभापति सुशील बस्नेतले राज्यले व्यवसायीको सुरक्षाको प्रत्याभूत दिलाउनुपर्ने बताउनुभयो । कार्यक्रममा तुलसीपुर उपमहानगरपालिकाका नगरप्रमुख टिकाराम खड्काले सुनका गरगहना बनाउने कालिगडलाई तालिम प्रदान गर्न नगरले आवश्यक बजेट व्यवस्थापन गर्ने बताउनुभयो ।
कार्यक्रममा इलाका प्रहरी कार्यालय तुलसीपुरका प्रमुख डिएसपी पुष्पराज मल्ल, तुलसीपुर उद्योग वाणिज्य संघका पूर्व अध्यक्ष बिमल रिजाल, नेपाल सुनचाँदी व्यवसायी महासंघका केन्द्रीय सदस्य लोकराज स्वणर्कार लगायतले मन्तव्य राख्नुभएको हो । कार्यक्रमको सहजीकरण पत्रकार बसन्त परियारले गर्नुभएकोे हो ।
