दाङ, ९ मंसिर । ओभरलोड बोक्ने सवारी साधनमाथि दाङ प्रहरीले निगरानी बढाएको छ । प्रहरीले दुई दिनको अवधिमा ओभरलोड बोक्न ८० वटा सवारी साधनलाई नियन्त्रणमा लिएको छ ।
जिल्ला प्रहरी कार्यालय दाङ कार्यालय मातहत प्रहरी इकाईहरु समेतमा खटेर ओभरलोड बोक्ने सवारी साधनलाई नियन्त्रणमा लिएको प्रवक्ता चक्रबहादुर शाहले जानकारी दिनुभयो ।
प्रहरीले चेकजाँचको क्रममा ढुङ्गा, चुनढुङ्गा, गिट्टी र बालुवा ओभर लोड बोक्ने ८० वटा सवारी साधनलाई नियन्त्रणमा लिई प्रत्येक सवारी साधनबाट दुई हजार जरिवाना असुल गरेको छ । प्रवक्ता शाहका अनुसार ८० वटा सवारीसाधनबाट १ लाख ६० हजार जरिवाना असुल गरिएको छ ।
प्रकाशित मिति : २०८२ मङ्सिर ९ गते मङ्गलवार
