दाङ, १० मंसिर । तुलसीपुर उपमहानगरपालिका वडा नम्बर १ का निवर्तमान वडा अध्यक्ष लक्ष्मण भण्डारीको ५५ वर्षको उमेरमा निधन भएको छ । लामो समयदेखि कलेजो सम्बन्धि समस्याबाट पिडित भण्डारीको सोमबार (आज) बिहान साढे ५ बजेतिर घरमै निधन भएको हो ।
स्वर्गिय भण्डारीको अन्त्येष्टि आजै भमके खोलामा गरिने परिवारले जनाएको छ । उहाँको निधनले परिवार, स्थानीय समाज र राजनीतिक क्षेत्रमा शोक छाएको छ ।
तुलसीपुर उपमहानगरपालिका र स्थानीयले श्रद्धाञ्जलि व्यक्त गर्दै स्वर्गिय भण्डारीको योगदानको स्मरण गरेका छन् । नेकपा (एमाले) का सक्रिय नेता भण्डारी २०७४ सालको चुनावमा वडाअध्यक्षमा निर्वाचित हुनुभएको थियो ।
उहाँले आफ्नो कार्यकालमा वडाको विकास र व्यवस्थापनमा सक्रिय रहेको भन्दै स्थानीयले स्मरण गरेका छन् । उहाँका एक छोरा र एक छोरी रहेका छन् ।
प्रकाशित मिति : २०८१ मङ्सिर १० गते सोमवार
