तुलसीपुर, ८ असाेज। दाङको तुलसीपुर निवासी डियाल गिरी ‘राजु’ नेपाली जनसम्पर्क समिति अस्ट्रेलियाको न्यु साउथ वेल्स (NSW) राज्य समितिको नव–निर्वाचित सभापति बनेका छन्।
सिड्नीको रकडेलमा सम्पन्न समितिको पाँचौँ अधिवेशनबाट गिरी नेतृत्वमा नयाँ कार्यसमिति चयन भएको हो। निर्वाचित गिरीलाई विभिन्न क्षेत्रबाट बधाई तथा सफल कार्यकालको शुभकामना व्यक्त गरिएको छ।
राजु गिरी कृष्णकुमार गिरीका छोरा हुन्। तुलसीपुर निवासी कृष्णकुमार गिरी पञ्चायत व्यवस्थाविरुद्धको राजनीतिक संघर्षमा सक्रिय रूपमा सहभागी भएका पुराना लोकतन्त्रवादी नेताका रूपमा परिचित छन्। प्रजातन्त्र प्राप्तिका लागि पञ्चायत व्यवस्थाविरुद्ध संघर्ष गर्ने क्रममा उनले लामो समय जेल जीवनसमेत बिताएका थिए।
२०२९ सालदेखि २०३१ सालसम्म पञ्चायत व्यवस्थाविरुद्धका विभिन्न गतिविधिमा सक्रिय रहेको क्रममा गिरीले कष्टकर जेल जीवन बिताउनुभयो । लोकतन्त्र र प्रजातान्त्रिक आन्दोलनमा लामो समयदेखि सक्रिय रहँदै आएका गिरी नेपाली कांग्रेसको राजनीतिमा समेत निरन्तर क्रियाशील छन्।
उनी नेपाली कांग्रेसको १४ औँ महाधिवेशनमा महाधिवेशन प्रतिनिधिका रूपमा निर्वाचित भएका थिए। साथै, नेपाली कांग्रेसको विशेष महाधिवेशनमा समेत सक्रिय पक्षधरका रूपमा सहभागी भएका गिरी १५औँ महाधिवेशनमा पनि सक्रिय रूपमा सहभागी हुँदै आएका छन्। हाल उनी दाङ क्षेत्र नम्बर ३ बाट महाधिवेशन प्रतिनिधिका प्रत्यासीका रूपमा सक्रिय छन्।
राजु गिरीको नेतृत्वमा NSW राज्य समितिले नेपाली समुदायबीचको एकता, सहकार्य र सामाजिक सम्बन्धलाई थप मजबुत बनाउँदै अघि बढ्ने अपेक्षा गरिएको छ। आगामी कार्यकालमा संस्थालाई थप सशक्त, एकताबद्ध र प्रभावकारी बनाउँदै रचनात्मक तथा समुदायमुखी गतिविधिलाई प्राथमिकता दिने विश्वास व्यक्त गरिएको छ।
तुलसीपुरमा सामाजिक तथा सार्वजनिक क्षेत्रमा सक्रिय परिवारको पृष्ठभूमिबाट आएका गिरीको अस्ट्रेलियास्थित नेपाली समुदायको संस्थाको नेतृत्वमा भएको चयनलाई तुलसीपुरवासीले समेत चासोका साथ हेरेका छन्।
