दाङ, २७ कार्तिक । ६० को दशकमा लोकप्रिय बनेको ‘जब तिमी एक्लै थियौं’ गीतबाट गायन यात्रा सुरु गरेका गायक विनय कार्की क्षेत्रीले ल्याएको नयाँ गीत रिलिज भएको छ । कार्कीले ‘किन छिन् छिन्’ बोलको गीत रिलिज गर्नुभएको हो ।
कमल खत्रीको रचना तथा संगीतमा तयार भएको गीतमा उहाँले अञ्जना सारुसँग युगल गायन गर्नुभएको छ । गायिका सारू ‘इमेज लोककलाकार सिजन १’की विजेता हुनुहुन्छ ।
गीत रिलिजपछि विनयले ‘जब तिमी एक्लै थियौं’ बोलको गीतको लोकप्रियता सम्झदै त्यसपछिको समय करिब सात वर्ष संगीत संयोजनमा व्यस्त भएकोले गायनमा समय दिन नसकेको बताउनुभयो ।
कार्कीले अब भने आफू नियमित रुपमा गायनमा सक्रिय हुने बताउनुभयो । गायनमा पुनः सक्रिय हुनकै लागि उहाँले ‘भ्वाइस अफ नेपाल, सिजन टु’को मञ्च रोज्नुभएको हो ।
ब्लाइन्ड अडिसनमा ‘भूमो’ गीत गाएका विनयका लागि त्यतिबेला चारै जना जजहरुले हरियो बर्जर बजाएका थिए । उहाँको यो गीतको अडिसन भिडियो सामाजिक संजालमा भाइरल बनेको थियो । उद्यपी उहाँ दोश्रो चरणमै निराश हुनुपर्यो ।
उहाँले अब पुनः दर्शकको मन जित्ने अभियानमा लागेको बताउँदै त्यही सिलसिलामा ‘किन छिन् छिन्’ बोलको गीत रिलिज गरेको बताउनुभयो ।
आफ्नो गीत श्रोताले मनपराउनेमा उहाँ आशावादी रहनुभएको छ । विनय पछिल्लो समय यूट्यूब तथा टेलिभिजनमा लोकप्रिय रहेका टेलिश्रृखंलाहरुका पार्श्व संगीतकारसमेत हुनुहुन्छ । उहाँले ‘बुहारी’, ‘हल्कारा माइलो’, ‘जुठे’, ‘नारी’ गरी दर्जनबढि टेलिश्रृखंलाहरुका पार्श्व संगीत दिनुभएको छ ।
यस्तै यो गीतको भिडियो नितिन चन्दको निर्देशनमा तयार पारिएको हो । गीतको भिडियोमा श्रद्धा क्षेत्री, विक्राम पोखरेल तथा आरोही कार्की क्षेत्रीको अभिनय रहेको छ । भिडियो :
