तुलसीपुर, २१ बैशाख । तुलसीपुर उपमहानगरपालिका वडा नम्बर ७ मा उपभोक्ता समितिका पदाधिकारीलाई अभिमुखिकरण गरिएको छ । योजनामा उपभोक्ता समितिको गठन प्रक्रिया तथा भुक्तानी प्रक्रिया सम्बन्धि जानकारी गराउन उपभोक्ता समितिका पदाधिकारीलाई अभिमुखिकरण गरिएको हो ।
त्यस अवसरमा वडा नम्बर ७ का अध्यक्ष राम बहादुर जिसीले उपभोक्ता समितिलाई आवश्यक कुराको जानकारी नहुँदा योजना निर्माण र भुक्तानीमा समस्या पर्ने गरेको बताउनुभयो । उहाँले अभिमुखिकरणसंगै आगामी दिनमा उपभोक्ता समितिले काम गर्दा समस्या बेहोर्नु नपर्ने बताउनुभयो ।
सहभागी उपभोक्ता समितिका पदाधिकारीले भुक्तानी लिँदा बैंकले पान नम्बर खोज्दा समस्या बेहोर्नुपरेको गुनासो गरेका छन् । भुक्तानी लिँदा पान नम्बर चाहिने व्यवस्था झन्जटिलो रहेको उनीहरुको भनाई छ ।
तुलसीपुर उपमहानगरपालिकाका इन्जीनियर दिनेश गुप्ता, लेखा अधिकृत पदम कुमार ज्ञवाली, योजना शाखाका अधिकृत कुन्ता भण्डारीले अभिमुखिकरण गर्नुभएको हो । कार्यक्रमको सहजीकरण वडाका कर्मचारी सन्तोष केसीले गर्नुभएको हो ।
