२०८१ जेष्ठ ५ गते शनिवार

आज उपराष्ट्रपतिको निर्वाचन

दाङ, ३ चैत । तेस्रो उपराष्ट्रपति चयनका लागि शुक्रबार निर्वाचन हुँदैछ ।

शुक्रबार बिहान १० देखि दिउँसो ३ बजेसम्म संघीय संसद् भवनको ल्होत्से हलमा मतदान हुनेछ ।

उपराष्ट्रपति चयनका लागि प्रतिनिधि सभा, राष्ट्रिय सभा र प्रदेश सभाका सांसदहरुले मतदान गर्ने छन् । उनीहरुलाई छुट्टाछुट्टै स्थानमा मतदानको ब्यवस्था मिलाइएको निर्वाचन अधिकृतको कार्यालयले जनाएको छ । प्रदेश सभाका ५५० र संघीय संसद्का ३३२ जना मतदाता रहेका छन् ।

मतदानका लागि प्रदेश र संघीय सांसदहरूलाई छुट्टाछुट्टै मतदान केन्द्र तोकिएको छ ।

उपराष्ट्रपति निर्वाचनमा एक संघीय सांसदको मतभार ७९ र एक प्रदेश सांसदको मतभार ४८ गणना हुनेछ ।

उपराष्ट्रपतिका लागि चार जनाको उम्मेदवारी परेको छ । नेकपा (एमाले) बाट अष्टलक्ष्मी शाक्य, जनमत पार्टीबाट ममता झा, जनता समाजवादी पार्टी (जसपा)बाट रामसहायप्रसाद यादव र सोही पार्टीकी प्रमिला कुमारीको उम्मेदवारी परेको छ । तर, प्रमिलाले रामसहायलाई समर्थन गर्दै उम्मेदवारी निष्क्रिय भएको घोषणा गरिसक्नु भएको छ ।

मतपत्रमा उम्मेदवारहरुको नामसहित फोटो पनि राखिएको छ । मतपत्रमा पहिलो क्रममा एमालेबाट उम्मेदवारी दिएका शाक्य, दोस्रो क्रममा जसपाबाट उम्मेदवारी दर्ता गराएकी प्रमिला कुमारी, तेस्रोमा जनमत पार्टीका ममता झा र चौथोमा जसपाकै रामसहायप्रसादको नाम उल्लेख छ ।

निर्वाचनको मतपरिणाम शुक्रबार साँझ नै सार्वजनिक हुने निर्वाचन अधिकृतको कार्यालयले जनाएको छ ।

मुलुक संघीय लोकतान्त्रिक शासन व्यवस्थामा प्रवेश गरेपछि पहिलो उपराष्ट्रपतिमा परमानन्द झा निर्वाचित हुनुभएको थियो । दोस्रो र तेस्रो निर्वाचनबाट उपराष्ट्रपतिमा नन्दबहादुर पुन निर्वाचित हुनुभएको थियो ।

प्रकाशित मिति : २०७९ चैत्र ३ गते शुक्रवार
प्रतिक्रिया दिनुहोस