सल्यान, १४ मंसिर ।
सल्यानमा २४ हजार बढी मत बदर भएको छ । एक प्रतिनिधिसभा र दुई प्रदेशसभा रहेको सल्यानमा प्रत्यक्ष र समानुपातिकतर्फ गरी २४ हजार ६१ मत बदर भएको हो ।
कुल खसेको मत अनुसार प्रत्यक्षमा ११ हजार ६ सय १५ र समानुपातिकमा १२ हजार ४ सय ४६ मत बदर भएको हो ।
प्रतिशतका आधारमा प्रत्यक्षतर्फ सात र समानुपातिकमा आठ प्रतिशत मत बदर भएको मुख्य निर्वाचन अधिकृतको कार्यालयले जनाएको छ ।
सम्बन्धित निकायले मतदाता शिक्षालाई प्रभावकारी बनाउन नसक्दा मतदातामा भएको अन्योलताका कारण प्रत्यक्ष र समानुपातिकमा धेरै मत बदर भएको हो ।
मुख्य निर्वाचन अधिकृत गिरिराज गौतमका अनुसार प्रत्यक्षतर्फ प्रतिनिधिसभाको लागि खसेको कुल मत ७६ हजार ३ सय ५ मा ७ हजार ३ सय ५९ , प्रदेशसभा अन्तर्गत सल्यान १ मा खसेको ४१ हजार १ सय ७६ मतमा २ हजार ३ सय ४८ र २ मा ४१ हजार ९ सय ६७ मत खसेकोमा १ हजार ८ सय ९८ मत बदर भएका छन् ।
यसैगरी समानुपातिकमा प्रतिनिधिसभाको लागि ८४ हजार ७ सय ८९ मत खसेकोमा ६ हजार २ सय १५ र प्रदेशसभामा ८२ हजार ९ सय ९८ मत खसेकोमा ६ हजार २ सय ३१ मत बदर भएको छ ।
मतदाता शिक्षा प्रभावकारी बनाउन सरोकारवाला सबैको जिम्मेवारी रहेपनि प्रभावकारी नभएकै कारण खसेको मत बढी बदर भएको निर्वाचन कार्यालय सल्यानका प्रमुख निमराज भटराईले बताउनुभयो ।
निर्वाचनमा कार्यालयले स्वयंसेवक भर्ना गरेर जिल्लाका सबै पालिकामा मतदाता शिक्षा दिए पनि एकै मतदाताले एक चिह्नमा मात्र नभइ धेरैमा छाप लगाएको पाइएको हो ।
सल्यानमा १ लाख ५७ हजार ७ सय १ मतदाता रहेकोमा जिल्लाभरिका २ सय ५ मतदान केन्द्रबाट कुल मतदाताको ८४ हजारले तथा ५३.२७ प्रतिशतले मतदान गरेका थिए ।
