दाङ, ४ साउन । दाङमा भीरबाट लडेर एक जनाको मृत्यु भएको छ । राजपुर गाउँपालिका- ६ राजपुरका ६२ वर्षीय बुद्धिराम चौधरीको मृत्यु भएको प्रहरीले जनाएको छ ।
चौधरीको बाख्रा चराउन गएको समयमा बुकी लेखबाट लडेर मृत्यु भएको इलाका प्रहरी कार्यालय गढवाका प्रहरी निरिक्षक कालिका कार्कीले जानकारी दिनुभयो ।
स्थानीय टंकप्रसाद चौधरीको घरमा विगत तीन वर्षदेखि बुद्धिराम गाई, बाख्रा चराउने काम गर्दै आउनुभएको थियो । साउन एक गते बाख्रा चराउन गएका बुद्धिराम घर नफर्किएपछि उहाँको खोजी गरिएको थियो ।
खोजी गर्ने क्रममा गंगदी सामुदायिक वन उपभोक्ता समुहको बुकी लेखबाट खसेर मृत्यु भएको अवस्थामा बिहीबार शव फेला परेको प्रहरी निरिक्षक कार्कीले जानकारी दिनुभयो । शव पोष्ट मार्टमको लागि लमही अस्पतालमा राखिएको प्रहरीले जनाएको छ ।
प्रकाशित मिति : २०८१ साउन ४ गते शुक्रवार
