सल्यान, २८ भदौ ।
जीवन ज्योति माध्यमिक विद्यालयले बुधबार ७० औँ वार्षिक उत्सव मनाउँदै छ । कपुरकोट गाउँपालिका वडा नम्बर ५ रिममा रहेको विद्यालयले विभिन्न खेलकुद प्रतियोगितासहित साँस्कृतिक कार्यक्रम गरेर आफ्नो ७० औँ वार्षिकोत्सव मनाउन लागेको हो ।
वार्षिक उत्सव समारोहको उद्घाटन राष्ट्रिय सभा सदस्य उदयबहादुर बोहराले गर्ने विद्यालयका प्रधानाध्यापक भुपाल साहुले जानकारी दिनुभयो । विस २००९ सालमा स्थापना भएको विद्यालयले आफ्नो ७० औँ वार्षिक उत्सवका अवसरमा बुधबार बिहान प्रभातफेरि र स्मारिका बिमोचन गर्ने भएको छ ।
यस्तै विद्यालयमा स्थापना गरिएको अक्षयकोष मनिस्मृति फाउण्डेशनमार्फत बालविकासदेखि कक्षा १२ सम्मका जेहेन्दार तथा उत्कृष्ट छात्रछात्रालाई शैक्षिक सामग्रि समेत प्रदान गरिने उहाँले बताउनुभयो ।
विद्यालयले अहिले वार्षिक उत्सवको अवसरमा खेलकुद प्रतियोगिता संचालन गरिरहेको छ । बुधबार वार्षिक उत्सवको अवसरमा विद्यालयले खेलकुद प्रतियोगितामा प्रथम, द्वितीय र तृतीय स्थाना हासिल गर्ने समुहलाई पुरस्कार प्रदान गरिने प्रअ साहुले बताउनुभयो ।
त्यस अवसरमा विद्यालयका पूर्व विद्यार्थी तथा संगीत क्षेत्रमा रहेका कलाकारहरु दिपेन्द्र पुनमगर, हिरान्जली मगर र भिम ज्वलन्त योगीको साँस्कृतिक प्रस्तुती रहने विद्यालयले जनाएको छ । यसैबिच वार्षिकोत्सव समारोहमा उपस्थितिका अभिभावक, विद्यार्थी, शैक्षिक क्षेत्रसंग सरोकारवाला लगायतलाई विद्यालयले अनुरोध गरेको छ ।
