बुटवल, २३ वैशाख । लगातारको वर्षाका कारण बुटवल–नारायणघाट सडकखण्ड अन्तर्गत नवलपरासीको दाउन्नेमा सडक हिलाम्य भएपछि सवारी आवागमन अवरुद्ध भएको छ ।
दाउन्ने क्षेत्रको सडक चर्किएर भासिँदा सवारी साधन रोकिएका छन् भने दुईतर्फी जाम समेत लागेको छ । स्थानीय प्रशासनका अनुसार बर्दघाट नगरपालिका–४ स्थित दाउन्नेमा सडक भासिँदा पर्खाल समेत भत्किएको छ । चिप्लो सडकका कारण गाडी नचढ्ने अवस्था छ भने यात्रुहरू अलपत्र परेका छन् ।
अहिले पूर्वबाट पश्चिमतर्फ जाने सवारी साधनहरू दुम्किबास क्षेत्रमा रोकिएका छन् भने पश्चिमबाट पूर्वतर्फ गएका सवारीहरू बर्दघाटमै थन्किएका छन् ।
यातायात व्यवस्था विभाग र स्थानीय प्रशासनले यात्रुहरूलाई वैकल्पिक मार्ग प्रयोग गर्न आग्रह गरेका छन् । सडक मर्मत कार्य शुरु भइसके पनि अवरुद्ध मार्ग खुलाउन समय लाग्ने जनाइएको छ ।
सडकको अवस्था सुधार नभएसम्म अत्यावश्यक बाहेकका यात्राहरू स्थगन गर्न ट्राफिक प्रहरीको अनुरोध छ ।
