सल्यान, ७ जेठ । आज बिहान परेको असिना पानीका कारण सल्यानको कपुरकोट गाउँपालिकाका विभिन्न वडामा लगाइएका तरकारी बालीहरूमा ठूलो क्षति पुगेको छ ।
गाउँपालिकाका उपाध्यक्ष प्रकाश भण्डारीका अनुसार कपुरकोट गाउँपालिकाको वडा नं ५ लेख सलाम , भवनथान, सिन्दुरी दयकोट वडा नम्बर १ को सारपानी ,खोरबारे वडा नम्बर २ को गर्पा धनठाना क्षेत्रमा असिनापानीले तरकारी बालीमा ठूलो नोक्सानी गरेको छ। असिना पानी परिरहेकोले थप क्षति कहाँकहाँ के कति भयो विवरण आउन बाँकी छ ।
असिना पानीले विषेशगरी फुल्न लागेका टमाटर, बन्दा, फूलगोपी, खुर्सानी, काँक्रोलगायतका बाली नष्ट गरेको छ ।
झण्डै आधा घण्टासम्म लगातार असिना पानी परेपछि तरकारीमा अत्यधिक क्षति पुगेको प्रदिप बस्नेतले बताउनुभयो । असिनाले टमाटरको पात, डाँठ सबै च्यातिएको छ ।
कृषकहरूले तत्काल क्षतिको मूल्यांकन गरी राहत उपलब्ध गराउन गाउँपालिकासँग आग्रह गरेको उपाध्यक्ष भण्डारीले बताउनुभयो । क्षतिको विवरण पूर्णरुपमा आइनसकेको गाउँपालिकाले जनाएको छ । साना किसानहरूको मुख्य आयस्रोत नै तरकारी खेती भएकाले यो क्षतिले उनीहरूको दैनिक जीवनमा प्रत्यक्ष असर परेको छ ।
