अफगानिस्तानबाट पाँच लाख हतियार हराएको खुलासा भएको छ ।
बीबीसीको रिपोर्टअनुसार ती हतियारहरू या त बेचिएका छन् या त तस्करी गरिएका छन् । संयुक्त राष्ट्रसङ्घले यीमध्ये केही हतियारहरू अल–कायदासँग सम्बन्धित अतिवादी सङ्गठनहरूको हातमा परेको पनि आशङ्का गरेको छ ।
एक पूर्व अफगान अधिकारीले बीबीसीलाई बताएअनुसार २०२१ मा तालिबानले अफगानिस्तानमाथि पुनः नियन्त्रण लिएपछि उनीहरूले लगभग १० लाख सैन्य हतियार र उपकरणहरूको भण्डार फेला पारेका थिए ।
यी मध्ये धेरैजसो अमेरिकाको आर्थिक सहयोगमा खरिद गरिएका थिए । यसमा अफगानिस्तानबाट आएका पुराना हतियारहरू समावेश थिए, जसमा अमेरिकामा निर्मित एम ४ र एम १६ राइफलहरू पनि समावेश थिए ।
२०२१ मा तालिबान अगाडि बढ्दै जाँदा, अफगान सैनिकहरूमध्ये केहीले आत्मसमर्पण गरेका थिए भने केहीले आफ्ना हतियार र सवारी साधन लिएर भागेका थिए । त्यस्तै, अमेरिकी सेनाले पनि आफ्ना केही सैन्य उपकरणहरू त्यहाँ छोडेको थियो ।
बीबीसीले गत वर्ष दोहामा भएको संयुक्त राष्ट्र सुरक्षा परिषद्को प्रतिबन्ध समितिको बैठकमा तालिबानले आधा सैन्य उपकरण र हतियार हराएको स्वीकार गरेको उल्लेख गरेको छ । यस समितिका एक व्यक्तिले करिब पाँच लाख हतियार हराएको बताएका थिए ।
