दाङ, २ चैत । दाङको तुलसीपुरमा ट्याक्टरको ठक्करबाट एक बालिकाको मृत्यु भएको छ । मृत्यु हुनेमा सल्यान छत्रेश्वरी गाउँपालिका २ घर भई तुलसीपुर उपमहानगरपालिका–९ गौरीशंकर टोलमा सानी आमाको कोठामा बस्ने ९ वर्षकी दिपशिखा ओली रहेको प्रहरीले जनाएको छ ।
सानीआमा संगिता खड्काको कोठामा बस्ने दुर्गा प्रसाद ओलीको छोरी दिपशिखालाई बाटो काट्ने क्रममा ट्याक्टरले ठक्कर दिदा टाउको र मुखमा चोट लागेको थियो । उहाँको घटनास्थलमै मृत्यु भएको इलाका प्रहरी कार्यालय तुलसीपुरका प्रहरी प्रवक्ता प्रहरी निरीक्षक सुर्य रानाले जानकारी दिनुभयो ।
बालिकाको शब घटना स्थलमै रहेको प्रहरी प्रवक्ता रानाले बताउनुभयो । तुलसीपुर उपमहानगरपालिका–९ गौरीशंकर गौरीशंकर टोल देखी अटो भिलेजतर्फ जाँदै गरेको रा १ त ३२३९ नम्बरको खाली ट्याक्टले पैदल यात्री दिपशिखालाई ठक्कर दिदा उहाँको घटनास्थलमै मृत्यु भएको प्रहरीले जनाएको छ ।
ट्याक्टर ईलाका प्रहरी कार्यालय तुलसीपुरले नियन्त्रणमा लिएको छ । चालक फरार रहेको र खोजीकार्य जारी रहेको प्रवक्ता रानाले बताउनुभयो । घटनाबारे थप अनुसन्धान भइरहेको प्रहरीले जनाएको छ ।
