दाङ, २ चैत । तुलसीपुर बजारमा खानेपानीको व्यवस्थापन गरिरहेको तुलसीपुर खानेपानी उपभोक्ता तथा सरसफाई संस्थाको आगामी नेतृत्वका लागि आज निर्वाचन हुँदैछ । मतदान बिहान ८ बजेदेखि शुरु भएको छ ।
बिहान साढे ७ बजेदेखि मतदान हुने भनिएपनि तयारीमा ढिलाई हुँदा बिहान ८ बजेपछिमात्रै मतदान शुरु भएको हो ।
तुलसीपुरको अरनिको मैदानमा शुरु भएको मतदान बेलुका साढे ४ बजेसम्म हुने तालिका छ ।
निर्वाचनले तीन वर्षे कार्यकालका लागि नयाँ नेतृत्व चयन गर्नेछ । निर्वाचनमा विषेशगरी तीन प्रमुख दल नेपाली कांग्रेस, नेकपा एमाले र नेकपा माओवादी केन्द्रसहितका दलहरुका उमेदवार प्रतिष्पर्धामा रहेका छन् ।
निर्वाचनमा नेपाली कांग्रेसका तर्फबाट अध्यक्षमा यमकान्त भण्डारी, नेकपा एमाले र राष्ट्रिय प्रजातन्त्रबाट मनोज लामिछाने र नेकपा माओवादी केन्द्रसहित सात दलबाट सीताराम शर्मा चुनावी मैदानमा रहनुभएको छ ।
निर्वाचनमा १० हजार ९ सय १९ जनाले मतदान गर्न पाउने निर्वाचन समितिका संयोजक प्रदिप कुमार धितालले बताउनुभयो । उहाँका अनुसार मतदानका लागि तुलसीपुर खानेपानीबाट वितरण गरिएको परिचयपत्र वा नेपाली नागरिकता अनिवार्य गरिएको छ ।
