रुकुम पश्चिम, ६ असार । रूकुम पश्चिममा ट्याक्टर दुर्घटना हुदाँ एक जनाको मृत्यु भएको छ । दुर्घटनामा अरु थप ६ जना घाइते भएका छन् ।
दुर्घटनामा परी चौरजहारी नगरपालिका-१२ का २५ वर्षीय गोपाल खत्रीको मिसन अस्पतालमा उपचारका क्रममा मृत्यु भएको जिल्ला प्रहरी प्रमुख डिएसपी नवराज पोख्रेलले जानकारी दिनुभयो ।
दुर्घटनामा परी घाइते हुनेमा चौरजहारी नगरपालिका-११ का ९ वर्षीय डिल्ली डाँगी, चौरजहारी-१२ का ४३ वर्षीय बलु जैसी, १२ वर्षीया कल्पना वली, ४३ वर्षीय शरद शर्मा, चौरजहारी-५ का २३ वर्षीय चालक लक्ष्मण कुमाइ र २० वर्षीय विकास कुमाइ रहेको प्रहरीले जनाएको छ ।
घाइते मध्य ९ वर्षीय डिल्ली डाँगी र चालक लक्ष्मण कुमाइको अवस्था सामान्य रहेको छ । अन्य सबै घाइतेको अवस्था गम्भीर रहेको हुँदा मिसन अस्पताल चौरजहारीमा उपचार भइरहेको डिएसपी पोख्रेलले बताउनुभयो ।
बिहिबार बिहान १० बजेतिर चौरजहारी नगरपालिका-१२ को साना खोलास्थित भित्री सडक खण्डमा कुलो निर्माणको लागि ढुँगा बोकेर जाँदै गरेको कर्णाली प्रदेश ०३-००१ त ०००१ नम्बरको ट्रयाक्टर ब्रेक फेल भई सडकदेखि झण्डै ८० मिटर तल खसेको हो ।
