लमही, ८ मंसिर । मुक्त कम्लहरीहरुको सञ्जाललाई पालिका र जिल्ला स्तरमा सक्रिय बनाइने भएको छ । युएसएआइडी, नागरिक समाज र सञ्चार एवम् द-एसिया फाउन्डेशनको संयुक्त साझेदारीमा मुक्त कम्लहरी विकास मञ्चले शुक्रवार दाङको लमहीमा आयोजना गरेको मुक्त कम्लहरीको अधिकार र मुद्दाका लागि प्रमाणमा आधारित पैरवी परियोजना अन्तरगतको परियोजना परिचय बैठकमा सो विषयमा छलफल गरिएको हो ।
मुक्त कम्लहरी विकास मञ्चकी केन्द्रिय अध्यक्ष हिरामोती चौधरीले परियोजनाको विषयमा जानकारी गराउँदै हाल पालिका, नगर र जिल्लामा रहेका मुक्त कम्लहरीहरुको सञ्जाललाई सक्रिय बनाएर उनीको भुमिका तथा पहुँच बढाउने बताउनु भएको छ ।
उहाँले पालिका तथा नगरपालिकामा कम्लहरीहरुको डाटा अपडेट गरी प्रतिवेदन तयार पारेर सहयोग गर्ने तथा स्थानीय सरकारले बनाउने नीति, कार्यक्रम तथा योजना निमाणर्मा उनीहरुको पहुँच पुर्याउने कार्यक्रमको मुल उद्देश्य रहेको बताउनु भएको छ । उहाँले त्यसका लागि पहिलो चरणमा पालिका, नगर, जिल्ला हुँदै प्रदेश स्तरमा संवाद कार्यक्रम राखेको बताउनुभयो ।
मुक्त कम्लहरी विकास मञ्चकी केन्द्रिय अध्यक्ष हिरामोती चौधरीको अध्यक्षता एवम् लमही नगरपालिकाका नगर प्रमुख जोगराज चौधरीको प्रमुख आतिथ्यतामा भएको कार्यक्रममा बोल्दै नगर प्रमुख चौधरीले कम्लहरीको समस्या अन्त्यका लागि शिक्षामा पहुँच पुर्याउन आवश्यक रहेको बताउनुभयो ।
कार्यक्रममा दाङ, बाँके र बर्दियाका मुक्त कम्लहरीहरको सहभागीता रहेको थियो । मञ्चका कार्यकारी निर्देशक अमित घिसिङ तमाङको स्वागत मन्तव्यबाट सुरु भएको कार्यक्रमको सञ्चालन परियोजना निर्देशक सुबोध कुमार चौधरीले गर्नुभएको हो ।
